खूप हट्ट केल्यावर

खूप हट्ट केल्यावर

टचस्क्रीनवाला मोबाइल

बाबानी भेट दिलाय मला

माझ्या वाढ्दिवसाला

पुढचं वर्ष महत्त्वाचं आहे हे बजावत

मोबाइल बाहेर न्यायचा नाही या अटीवर..

त्यात खूप गेम्स आहेत

फोटो काढता येतात हवे तेवढे

झालंच तर गाणी साठवता येतात

रेकॉर्डींग करता येतं.. एसेमेस.. मेल..

आणि खूप काय काय..

बाबा घरात नसले की

त्यांचा लॅपटॉपही मिळतो

गूगलचे बोट धरून मी कुठे कुठे जाऊन येतो

फेसबुकवर भरपूर फ्रेंड्स आहेत माझे..

टी. व्ही. तर असतोच चोवीस तास

जगभरातलं सगळं उत्सुक

केव्हाही बाहेर पडायला

रिमोटची कळ दाबली नुसती

की हवं ते उघडतं समोर..!

तरी शाळेला सुट्टी पडली,

आई बाबा ऑफिसला गेले

की थोड्याच वेळात नकोसे होतात

हे सगळे सदातत्पर दोस्त..

अभ्यास करून संपतो

आणि मी अगदी एकटा उरतो

जगाची सैर करण्याच्या किल्ल्या जवळ असूनही...

मला एक बहीण असती तर..!

***